டெல்லி முதல்வர் அரவிந்த் கெஜ்ரிவாலுக்கு உச்ச நீதிமன்றம் இடைக்கால ஜாமீன் வழங்க வாய்ப்பு இருப்பதாக சொல்லப்படும் நிலையில், வேறொரு வழக்கில் அவரை சிக்கவைப்பதற்கு முயற்சி நடைபெறுகிறது என ஆம் ஆத்மியினரும், எதிர்க்கட்சியினரும் குற்றம்சாட்டுகிறார்கள்.
டெல்லி மதுபானக் கொள்கை தொடர்பான வழக்கில் டெல்லி முதல்வர் அரவிந்த் கெஜ்ரிவால் அமலாக்கத்துறையால் கைது செய்யப்பட்டு, திகார் சிறையில் அடைக்கப்பட்டிருக்கிறார். தனக்கு எதிரான கைது நடவடிக்கையை எதிர்த்து கெஜ்ரிவால் தாக்கல் செய்த மனுவை, டெல்லி உயர் நீதிமன்றம் நிராகரித்த நிலையில், உச்ச நீதிமன்றத்தில் கெஜ்ரிவால் மேல்முறையீடு செய்திருக்கிறார்.கெஜ்ரிவால் மேல்முறையீட்டு மனு தொடர்பாக தனது பதிலை அமலாக்கத்துறை தாக்கல் செய்ய வேண்டும் என்று உச்ச நீதிமன்றம் உத்தரவிட்டிருந்தது.
இந்த நிலையில், இந்த வழக்கு மே 3-ம் தேதி மீண்டும் விசாரணைக்கு வந்தபோது, ‘தற்போது மக்களவைத் தேர்தல் நடைபெறுவதால், கெஜ்ரிவாலுக்கு இடைக்கால ஜாமீன் வழங்குவது குறித்து பரிசீலிக்கப்போகிறோம்’ என்று வழக்கை விசாரித்துவரும் உச்ச நீதிமன்ற நீதிபதிகள் தெரிவித்தனர்.
உச்ச நீதிமன்றம் இடைக்கால ஜாமீன் வழங்கினால், திகார் சிறையிலிருந்து வெளியே வந்து தேர்தல் பரப்புரையில் கெஜ்ரிவால் ஈடுபடுவார் என்று எதிர்பார்க்கப்படுகிறது. இந்தச் சூழலில், யாரும் எதிர்பாராத விதமாக, ‘காலிஸ்தான் தீவிரவாத அமைப்பிடமிருந்து கெஜ்ரிவால் ரூ.135 கோடி பெற்றார் என்ற விவகாரம் குறித்து என்.ஐ.ஏ விசாரணை செய்ய பரிந்துரை’ என்ற விவகாரம் அரசியல் வட்டாரத்தில் அதிர்ச்சியை ஏற்படுத்தியிருக்கிறது.அமெரிக்காவில் நியூயார்க் நகரைத் தலைமையிடமாகக் கொண்டு சீக்கியருக்கான ‘ நீதி அமைப்பு (சீக்ஸ் ஃபார் ஜஸ்டிஸ்) செயல்படுகிறது. இந்த அமைப்பை 2019-ம் ஆண்டு தடைசெய்த மத்திய அரசு, இந்த அமைப்பை தீவிரவாதக் குழுக்கள் பட்டியலில் சேர்த்தது. இந்த அமைப்பிடம் ஆம் ஆத்மி கட்சி நிதியுதவி பெற்றது என்று இப்போது பகீர் கிளப்பும் டெல்லி துணை நிலை ஆளுநர் வி.கே.சக்சேனா, இது தொடர்பாக கெஜ்ரிவாலிடம் என்.ஐ.ஏ விசாரணை நடத்த வேண்டும் என்று கூறுகிறார்.
ஆம் ஆத்மி கட்சிக்கு சீக்கியருக்கான நீதி அமைப்பு ரூ.134 கோடி வழங்கியதாக துணைநிலை ஆளுநர் தரப்பு கூறுகிறது. எனவே, தீவிரவாத அமைப்பிடமிருந்து நிதி பெற்றது குறித்து கெஜ்ரிவாலிடம் என்.ஐ.ஏ விசாரணை நடத்த வேண்டும் என்று வி.கே.சக்சேனா பரிந்துரைத்திருக்கிறார். இது குறித்து மத்திய உள்துறை அமைச்சக செயலாளருக்கு அவர் கடிதம் எழுதியிருக்கிறார்.ஏற்கெனவே, மக்களவைப் பொதுத் தேர்தலுக்கு முன்பாக இரண்டு முதல்வர்களை (ஜார்க்கண்ட் முன்னாள் முதல்வர் ஹேமந்த் சோரன், டெல்லி முதல்வர் கெஜ்ரிவால்) கைது செய்து சிறையில் அடைத்ததற்காக பா.ஜ.க அரசு மீது சர்வதேச அளவில் விமர்சனங்கள் எழுந்தன. கெஜ்ரிவால் கைது செய்யப்பட்டவுடன் அது குறித்து கருத்து தெரிவித்த அமெரிக்கா, ‘நியாயமான, நேர்மையான, வெளிப்படையான நீதி விசாரணையை அமெரிக்கா ஆதரிக்கிறது. அதில் யாருக்கும் மாற்றுக் கருத்து இருக்க முடியாது’ என்று கூறியது.‘கெஜ்ரிவாலுக்கு நியாயமான நீதி விசாரணை நடைபெற வேண்டும்’ என்று ஜெர்மனி கோரியது. அதைத் தொடர்ந்து, உள்நாட்டு விவகாரங்களில் தலையிடக் கூடாது என்று அமெரிக்காவையும், ஜெர்மனியையும் இந்தியா எச்சரித்தது. அரவிந்த் கெஜ்ரிவால் கைது செய்யப்பட்டதை சர்வதேச ஊடகங்களும் விமர்சித்தன என்பது குறிப்பிடத்தக்கது.
தற்போது, உச்ச நீதிமன்றம் இடைக்கால ஜாமீன் வழங்கினாலும் கெஜ்ரிவால் சிறையிலேயே அடைக்கப்பட்டிருக்க வேண்டும் என்ற நோக்கத்துடன் என்.ஐ.ஏ விசாரணை கோரப்படுவதாக பா.ஜ.க மீது ஆம் ஆத்மி குற்றம்சாட்டியிருக்கிறது.டெல்லி அமைச்சரும், ஆம் ஆத்மியின் தலைவர்களில் ஒருவருமான சவுரப் பரத்வாஜ், ‘பா.ஜ.க-வின் ஏஜென்ட்டாக டெல்லி துணைநிலை ஆளுநர் செயல்படுகிறார்’ என்று விமர்சித்திருக்கிறார். மேலும், ‘டெல்லியில் ஏழு மக்களவைத் தொகுதிகளிலும் பா.ஜ.க தோற்கப்போகிறது. ஆகையால், முதல்வர் கெஜ்ரிவாலுக்கு எதிராக பா.ஜ.க உத்தரவின்பேரில் சதிவலை பின்னப்படுகிறது. பஞ்சாப் சட்டமன்றத் தேர்தலுக்கு முன்பாகவும் இதுபோன்ற சதிவலை ஆம் ஆத்மிக்கு எதிராக பின்னப்பட்டது. ஆனால், பஞ்சாப் மக்கள் பா.ஜ.க-வுக்கு படுதோல்வியைக் கொடுத்தார்கள். இப்போதும் மே 25-ம் டெல்லி மக்கள் தங்கள் வாக்குகள் மூலமாக பா.ஜ.க-வுக்கு தக்க பதிலடி கொடுப்பார்கள்’ என்றார்.
