சங்கரன்கோவில் அருகே உள்ள ஆண்டார்குளத்தை சேர்ந்தவர் சேவியர். இவருக்கு செல்வம் மற்றும் சுப்புலட்சுமி என இரண்டு மனைவிகள் உள்ளனர். இதில் இரண்டாவது மனைவி சுப்புலட்சுமி அப்பகுதியில் விவசாயத்தோடு, பன்றி பண்ணையும் நடத்தி வருகிறார். இதில் முதல் மனைவியின் மகன் ஆரோக்கிய ராஜ்க்கும் சுப்புலட்சுமிக்கும் கடந்த சில ஆண்டுகளாக சொத்து தகராறு இருந்து வந்துள்ளதாக கூறப்படுகிறது. இந்நிலையில் சுப்புலட்சுமி பன்றி பண்ணைக்கு தீவனங்கள் வாங்க டாட்டா ஏசி வாகனம் ஒன்றை வாடகைக்கு எடுத்து செல்லும் வழியில் நகரம் என்ற பகுதியில் ஓட்டுநர் தேநீர் அருந்த இறங்கிய போது அருகில் இருந்த சுப்புலட்சுமி டிரைவர் வரும் வரை காத்திருந்தார். அப்போது அங்கு வந்த ஆரோக்கிய ராஜ் வாகனத்திற்குள் அமர்ந்திருந்த சுப்பலட்சுமியை வாகனத்தில் வைத்து கத்தியால் குத்தியும் வெட்டியும் சரமாரியாக தாக்கியுள்ளார். இதில் பலத்த காயமடைந்த சுப்புலட்சுமி டாடா ஏஸ் வாகனத்தில் வைத்தே உயிரிழந்துள்ளார். இச்சம்பவம் குறித்து தகவலறிந்த காவல்துறையினர் விரைந்து வந்து அதே வாகனத்தில் சுப்புலட்சுமியின் சடலத்தை உடற்கூறு ஆய்வுக்காக சங்கரன்கோவில் அரசு மருத்துவமனைக்கு அனுப்பி வைத்தனர். மேலும் இச்சம்பவம் குறித்து சங்கரன்கோவில் தாலுகா காவல் துறையினர் வழக்கு பதிவு செய்து தப்பி ஓடிய ஆரோக்கிய ராஜை தீவிரமாக தேடி வருகின்றனர்.
