ஊட்டி: மீட்கப்பட்ட இரண்டு புலிக்குட்டிகளில் ஒன்று உயிரிழந்துள்ளது. உயிருடன் உள்ள மற்றொரு குட்டிக்கு தொடர்ந்து சிகிச்சை அளிக்க சென்னை அறிஞர் அண்ணா உயிரியல் பூங்கா தேர்வு செய்யப்பட்டுள்ளதாக வனத்துறை தெரிவித்துள்ளது.
புலிகளுக்கான வாழிடம் பற்றாக்குறை, நீலகிரி உயிர்க்கோளக் பகுதியில் மிகக் கடுமையான பாதுகாப்புச் சவாலாக உருவெடுத்து வருகிறது. வாழிட இழப்பு மற்றும் துண்டாக்கம் அதிகரித்துவருவதால் மனிதர்–விலங்கு மோதல்கள் தீவிரமடைந்து, மனிதர்களுக்கும் பெரிய இரைமிருகங்களுக்கும் ஆபத்துகள் அதிகரித்துள்ளன. நிலப் பயன்பாட்டில் மாற்றங்கள், காடு சேதம் போன்ற மனிதச் செயல்பாடுகள் புலிகளின் உயிர்வாழ்வையும் இனப்பெருக்கத் திறனையும் குறிப்பிடத்தக்க அளவில் பாதித்து வருகின்றன.
இந்த நிலையில், ஊட்டி அருகிலுள்ள சோலாடா பகுதியில் தாயின்றி உடல் மெலிந்து அலைந்துகொண்டிருந்த இரண்டு புலிக்குட்டிகளை உள்ளூர் மக்கள் கவனித்து வனத்துறைக்கு தகவல் அளித்தனர். அதனைத் தொடர்ந்து, வனத்துறையினர் நான்கு நாட்கள் களப்பணியில் ஈடுபட்டு, இரு குட்டிகளையும் உயிருடன் மீட்டு தீவிர கால்நடை மருத்துவ சிகிச்சை அளித்தனர்.
கள ஆய்வுகள், சுமார் ஐந்து மாதங்கள் வயதான இக்குட்டிகள் தனியாக வேட்டையாட முடியாத நிலையில் இருந்ததையும், கடுமையான ஊட்டச்சத்து குறைவால் பாதிக்கப்பட்டிருந்ததையும் உறுதிப்படுத்தின. தாய் புலியின் இருப்பை கண்டறிய கேமரா கண்ணிகள் பொருத்தப்பட்டும், அதன் நடமாட்டம் பதிவாகவில்லை. இதனால் அவசர தலையீடு அவசியமானது.
வைத்திய நிபுணர்கள் தொடர்ந்து சிகிச்சை அளித்தபோதிலும், ஒரு குட்டி உயிரிழந்தது. உயிருடன் உள்ள மற்றொரு குட்டி மேம்பட்ட சிகிச்சை மற்றும் கண்காணிப்பிற்காக சென்னை வண்டலூரிலுள்ள உயிரியல் பூங்காவிற்கு மாற்றப்படுகிறது. தாய் புலியின் நிலை குறித்த விசாரணைகள் தொடர்ந்து நடைபெற்று வருகின்றன.
முதற்கட்ட கண்காணிப்புகளின்படி, மனிதர்களால் ஏற்படுத்தப்பட்ட காட்டுத் தீ காரணமாக இக்குட்டிகள் அனாதையாகியிருக்கலாம் என கருதப்படுகிறது. இத்தகைய நிகழ்வுகள் சூழலியல் அமைப்பில் தொடர் விளைவுகளை ஏற்படுத்துகின்றன என்பதையும் இது வெளிப்படுத்துகிறது. உயிருடன் உள்ள குட்டியின் நிலை இன்னும் கவலைக்கிடமாக உள்ளதால், ஆதாரபூர்வமான வனவிலங்கு பாதுகாப்பு நடவடிக்கைகளையும் வாழிடம் பாதுகாப்பையும் வலுப்படுத்துவது அவசரத் தேவையாகும்.
