கிருஷ்ணகிரி மாவட்டம் ஓசூரில், ‘வந்தே மாதரம்’ பாடலுக்கு காங்கிரஸ் தலைவர்கள் உரிய மரியாதை அளிக்கவில்லை எனக் கூறி, பாஜக சார்பில் கண்டன ஆர்ப்பாட்டம் நடைபெற்றது. கிருஷ்ணகிரி மேற்கு மாவட்ட பாஜக தலைவர் நாராயணன் தலைமையில் ராம் நகர் அண்ணா சிலை அருகே நடைபெற்ற இந்த ஆர்ப்பாட்டத்தில், சோனியா காந்தி, ராகுல் காந்தி, மல்லிகார்ஜுன கார்கே ஆகியோருக்கு எதிராக முழக்கங்கள் எழுப்பப்பட்டன. இந்த ஆர்ப்பாட்டத்தில் வந்தே மாதரம் பாடலை அவமதித்ததாக கூறப்படும் சம்பவத்திற்கு காங்கிரஸ் தலைவர்கள் பகிரங்க மன்னிப்பு கேட்க வேண்டும் என பாஜகவினர் வலியுறுத்தினர். இதில் பாஜக மாவட்ட நிர்வாகிகள், அணி நிர்வாகிகள் மற்றும் தொண்டர்கள் கலந்து கொண்டனர்.
